UG want more money but can’t account fuh it

TIMES INT'L

Every time yuh talk to a UG student yuh always bound to hear a complain – no proper library, no proper classrooms, no proper lecturer, no proper labs, no proper ground, no proper dorms, and no proper facilities.
It look like every ting bad on de campus nowadays, even de minibus drivers and conductors dem who does want to charge de students extra money as soon as de sun go down.
But de same time de student body call fuh more money from the government budget is de same time Green Jah and Rum Jhaat seh dem gon cut de budget. Yet both Green Jah and Rum Jhaat seh dem want to change UG. It look like dem want to change it to UGLY, but then a group of students seh that is how de campus is anyway… as well as some of de people who does wuk pun de campus and who does go to pick up people.
Before yuh coulda blink, two staff get send home wid immediate effect because dem can’t account fuh de money.
See Rum seh he can’t see where de money gone and Haze Hell seh she in a haze and couldn’t see what See Rum was doing wid de money.
One of de accounts staff member at UGLY seh de chief accountant was de chief cook and bottle washer fuh de missin funds. But another accounts staff blame de bursar – he seh de bursar used to buss up de safe wid de money and give de chief cook and bottle washer fuh cook up de books.
Ting-a-ling-a-ling… friend tell friend… mattie tell mattie! So UGLY gone from one problem to another. Dem ain’t got Freddie Kissmansoon to thief de books, but now See Rum and Haze Hell thiefin de money!

Related posts