Dem boys who seh dem is boys, but dem is not boys although dem does dress like boys to fool people, had start attackin de Beacon paper since when it had start up. Dem boys still ain’t done yet. Dem boys firin more missiles now like how dem bandits firin guns in GT de garbage town. Dem firin even more than whah de man pun Middle Street fire last week and whah dem police fire at de prison over de weekend.
Dem boys who seh dem is boys fire missiles so much that de firin start to back fire pun dem. Now is dem own fire ketchin all dem boys in dem back because some of dem wanna back down. And dem boys specialise in any ting to do wid back. Is sheer back fire, back down, and back up goin on.
Missiles even firin pun one another. Lalloo Suspenders Ram firin from back and front at de opposition. Rum Karran puttin fire in dem too. But somebody from de Kay Man lookin to put Rum Karran in de fire all by he self. And he ain’t no Shadrach, Meshach, and Adednego. So he gon burn from earth to hell.
Mook Lall now start firin in dem boys camp. De Mook back up a couple of dem boys fuh know who sendin out he official photos. Now de Mook wanna play Snow Den and read people email and listen to dem phone calls like de U. S. Whah de Mook don’t know is that de U. S. done hear he pun de phone already. And soon dem gon hear he in the New York court when he turn up wid he headitor. Dem gon learn first hand how lash does bring lash back. Not that de Mook and de headitor mind de lashin anyway.
Ting-a-ling-a-ling… friend tell friend… mattie tell mattie! That is how tings does turn out when a rice eater barkin at de gate. As soon as dem get a holler, dem does put dem tail between dem leg! That is why no body ain’t seein de Mook tail these days.