This riggnin thing gone too far

TIMES INT'L

When de Pee-N-C party decide to change dem name, de first time dem put on just a “R”. People wasn’t sure why dem do that. At first, dem seh it mean “reform”, but de only ting dem was reformin was how to get re-elected all de time by thiefin de elections from de Pee-P-P and from de people.

But thankfully, eventually every body realise that the “R” was fuh “riggin”, although it was since in Burnt Ham time that de Pee-N-C was involved in big time riggin by diggin. That is, diggin up dead people name and puttin dem pun de voters’ list.

Well, de Heights man come pun de scene, he become a even bigger rigger than Burnt Ham. Leff, right and centre was sheer riggin. In fact, if de Heights man had live a lil longer, wid de rate at which he was goin, de whole of Guyana woulda been votin fuh he.

That is, accordin to de riggin rate whah he had start up wid right after Burnt Ham dead. Some body seh de other day at de Pee-N-C Con Gress that if de Heights man hadn’t join Burnt Ham down below, de voters woulda even out number de whole population by now. That was how high de Heights man coulda reach.

So now here come de Harmy man Green Jah pun de scene. By this time de Pee-N-C was even doin trainin fuh show people how to rig. And Rum Jhaat and de Nagga man was de first two to attend de full programme.

At least Green Jah hands was tied because he coulda never get he hands on de big prize. So he do de next best ting by riggin he own elections and diggin out Linden and Plaisance from de whole ting. Even de wise man Solo man couldn’ta find word fuh describe whah happen.

Ting-a-ling-a-ling…friend tell friend…mattie tell mattie! Well, wid de CPL final over de weekend, people now wonderin if Green Jah also do any trainin fuh de Bajan vampire who umpire de game. This riggin ting gone very far!

Related posts