Some people in de letter writin career

TIMES INT'L

A new career start up in Guyana called letter writin and it look like some of de newspapers dem gon have to run a competition to see who is de best and who is de worst. Plenty people gon enter that competition, so it gon be a tough fight.

De fight to be number one gon be tough just like how de letter writers dem does fight down one another like crabs in a barrel. Lin Con, Ducktor Rose, Freddie Kissmansoon, Rue Hell, de mayor fuh life Green Ham and he letter writin officer Roy Stone, and Ben Cup leadin de way fuh number one.

One of dem who can’t write and does pay people fuh write fuh he got plenty letter writin names, so he gon have to decide what name to enter de competition under. Even de minister home affairs gon enter de competition, because he been writin a lotta letters too.

Is no wonder plenty people complain that dem does buy de local papers to read de news, but nowadays is more letters than news dem have to read. And some of dem letters long more than de Essequibo River, so is like yuh readin a whole book – before yuh done read yuh want sleep! De book thief Freddie Kissmansoon on de other hand figure that, since no body does read he columns any more, he gon write plenty letters. Now every time de Man Kisser got a problem wid somebody, he writin a letter.

Rue Hell, who writin sheer doggerel and puppyrel, which he want to call poem, decide that he gon do de only ting that he can do, which is sittin down in people cake shop bummin tennis roll and writin letters.

Ting-a-ling-a-ling… friend… tell… friend… mattie tell mattie! Is de only way people gon ever see Rue Hell name writin sum ting.

Related posts