Small days still on dem mind

TIMES INT'L

A still deh pun people mind, and that small days is a “good, good” time. That song is a nice song and plenty people like it, but while it might be true fuh some people, it ain’t true fuh all people.
That is because some people had good small days and some had bad small days. And dem who never had good small days does want to mek up in de days when dem grow up, or tink that dem grow up. So that is why some of dem does end up behaving like nevah see come fuh see when dem grow up.
Well, in Guyana it got some people around who never had good small days. That is why now that dem grow up dem still ain’t really grow up. Dem does behave like dem is bad boys and can do any ting, seh any ting, and write any ting bout any body.
Some of dem does even run to people in other countries to complain bout other people and bout de guvament. And when dem in Guyana, dem always behaving like a big bully who want to bad talk people and tell dem what to do and what not to do.
Dem boys who seh dem is boys tink dem grow up and dem does really want to behave like bad boys and does talk a lot and write a lot bout people who dem ain’t like or who dem jealous of. But life is strange and what does go around does come around. Old people seh yuh must never wish fuh people sum ting that yuh don’t wish fuh yuself.
Ting-a-ling-a-ling… friend tell friend… mattie tell mattie! Well, after all, it turn out that dem boys who seh dem is boys play bad boys wid a real bad boy. Now de whole country know who had to kneel down and beg. But one of dem boys seh dem like de kneelin down part!

Related posts