Seein is believin, but blind does lead de blind

TIMES INT'L

Old people does seh seein is believin and that whah ever yuh can’t see, yuh must have to feel before yuh believe. Some people does see wid dem mind only. But that is not seein, that is called dreamin. And some people does only see wid other people eye. But that is also not seein either, that is called believin whah another man seh he see and tekkin it fuh gospel truth, or as old people again seh – de blind leadin de blind.
Lallbachan Suspenders Ram is one a dem who does dream and seh he see. He does dream all kinda tings when he rammin wid he pardna in slime – de other old ram whah name Ram Bow — and then talk bout dem next day. But he don’t tell people bout de feelin part. That is top secret fuh de two old rams, because when dem fellas start feelin, dem does see heaven same time.
Rum Jhaat on de other hand is one a dem who don’t see too good. That is why he always blinkin like when de place too bright fuh he. But is really because he like darkness so much, and he does deh in darkness so much, that he not accustom to bein in de light.
De fact that Rum Jhaat not too bright either is another story. Imagine that is a lawyer and a politician and a parliamentarian who never know that certain reports does have to go to Parliament. Is no wonder he get kick out. He gotta be a real Jhaat fuh depend pun Lallbachan fuh tell he certain tings.
So Rum Jhaat does only see wid other people eye.
Whah ever Lallbachan Ram seh he see, Rum Jhaat does see. Like he does only see whah all dem Rams and Rums see – perfect example of de blind leadin de blind.
Ting-a-ling-a-ling… friend tell friend… mattie tell mattie! De only Ram that Rum Jhaat friken is de prezzi. That is because de prezzi does see thru all dem Rams and Rums like a book. That is called seein is believin!

Related posts