Rum Jhaat photo gon appear soon

TIMES INT'L

De new year only just start and it look like people gone back to de same old habits arready. De old done tek over de new. One man seh he gon stop drinking fuh de new year, and that he gon stop at 12 midnight on Old Year’s Night.

Well, de year start wid he drunk and since then he ain’t sober yet. And it ain’t de Nagga Man, although he also ain’t sober up yet, just that he ain’t (and would never) mek any resolution like that.

Who ain’t fightin and killin one another, drinkin and drivin and then killin one another. One man fight in Mahdia over a woman and now he gone under de Earth and leff de other man to be both under and over de woman.

De Pullice at least puttin de photo in de papers of dem who tink dem can drink all dem want and drive wid all de speed dem want and kill whoever dem want. Hope when de Pullice also get ketch wid rum in dem mouth, dem photo gon also appear.

On Old Year’s Night a Pullice officer stop a vehicle on de road by Cuffy Square and give de driver a breathalyser test. When de driver ask de Pullice to do de same test, de Pullice seh we could both put every ting to de test down de road by a sign board or up de road by Brickdam.

After de driver seh he prefer down de road by de sign board, de Pullice officer wuk done fuh de night, and de driver ain’t reach home till next morning empty pocket. And both of dem pass ‘on’ de test.

It musbe a miracle how Rum Jhaat ain’t get ketch fuh de whole of 2014, when fuh de whole year he been drinking a whole set of rum and then droppin home a whole set of people before goin home to mek a whole set of trouble.

Ting-a-ling-a-ling…friend tell friend…mattie tell mattie! Just look out fuh Rum Jhaat photo this year.

Related posts