Rum Jhaat is a man who can’t keep he mouth shut. De other day he open he mouth yet again.
He talk bout some body a**, but he sound like one. Wasn’t de first time either. One of he own neighbour seh is every day de man does mek he self one. Now he holler pun a lil gyal in de public service.
And this is a man who seh he fightin fuh de public service.
Is a natural ting if yuh tell somebody someting bout dem house, dem gon look at yuh own house before dem tell yuh back something in return. So that was Rum Jhaat intention. He talk bout somebody else behind to bring attention to he own.
Is not usual that people does want to bring attention to dem behind. Old people does call people like dem a real a**. So Rum Jhaat try it in a back handed way. He use reverse psychology. He talk bout somebody else own.
It gotta be something with Rum Jhaat and tings that deh behind. Every ting fuh he got some ting to do wid behind. He behind No Gel Hugly in de party fuh de leadership. He behind a company in India fuh de Specialty Hospital. Now he behind a man who tek guvament land.
Rum Jhaat always behind a bottle. He behind get drunk de other day at a cricket club bar and then he behind get stuck in de toilet bowl. Is dem boys who does dress like boys who had to come and tek out he behind. Actually was he face, but by then it had start to look like he behind.
And talkin bout dem boys, is dem boys who decide not to leff down Rum Jhaat behind after dem tek he out. Dem boys had he behind all over GT de garbage town. Is when he wake up he realise he deh alone and nobody deh behind! Just like he and de KFC. Ting-a-ling-a-ling… friend tell friend… mattie tell mattie! De whole of 2013 Rum Jhaat deh behind. Just wait and see in 2014 he gon deh more far behind!