Plenty buse-in goin on

TIMES INT'L

Buse-in one another is a common ting wid plenty people. But Freddie Kissmansoon get de record fuh bein de best buser-upper in de whole country.
Whenever he buse-in, it does be just like when a woman buse-in she neighbour fuh tekkin way she man. No neighbour ain’t gon ever tek way de Man Kisser fuh nuttin though. So buse-in gon never come from he neighbour fuh that.
De Man Kisser does buse yuh from how yuh mother mek you to how yuh gon look in yuh grave. Never mind he never see some of de people he does buse. And never mind half of what he say don’t mek sense, and de other half does be mek up stories. Buse-in is buse-in, and de Man Kisser does buse even when people not buse-in back.
Now Rush Khan rush in and buse de guvament bout labour laws and minimum wage. Then he rush in again and buse a man who get rob and still in de hospital. De man get shoot in he head, so he might not even hear what Rush Khan buse-in bout. But Rush Khan don’t mind that. He jusy like to buse… ask he workers dem!
De guvament and de opposition does also buse out one another. And nowadays students does buse out teachers. De other day, a man slap he wife fuh de same buse- in, but he end up in court and he learn to do de opposite of buse-in – beggin.
Stony Virus always buse-in some body too. He gettin just like de Man Kisser – buse-in everybody. Stony Virus even turn round and buse de man who bail he out when he was broke. Is de same man buy out he TV station, plus pay he out de court money.
Ting-a-ling-a-ling… friend tell friend… mattie tell mattie! Well, old people seh after one time is another time… is another big buse out start up wid Suspenders Ram and de Stabber. And dem two was like Jack and Jill!

Related posts