Mook Lall is a man, or so dem boys who seh dem is boys does tell people, who like to cuss down people. Any body who he want to bring down does get a cuss down. De Mook does cuss down from Harry Wright down to Harry Wrang. That is normal fuh someone wid a big mouth and only lil bit brains. It does sound just like how a old woman does cuss down when she get vex, especially if is another old woman mek she get vex.
Is just like how deputy mayor de old Green Case does sound when she cussin down de town clerk Carol Sober.
Green Case cuss down does be a long cuss down. De more Green Case cuss down, de more garbage does leff down pun de road in GT de garbage town. Green Case neither de mayor-fuh-life Green Ham don’t cuss down bout de garbage though. When Green Ham ready, he does cuss down just like de Mook. After all, de mayor-fuh-life also got limited brains just like de Mook.
Unlike Green Case, one of dem boys who seh dem is boys seh it ain’t got any woman around to get de Mook vex. Is only man does get he so vex, especially when is a man who better than he. And it ain’t tek much fuh be better than de Mook. So is no wonder de Mook does cuss anybody, including de headitor.
One of dem reporters pun Saffon Street seh de headitor does have to run when de Mook seh walk and jump when de Mook seh run. But de headitor only waitin fuh time. He tell de reporter he know de Mook mouth gon get cold soon, and that is when all cuss down gon turn to kneel down.
Ting-a-ling-a-ling… friend tell friend… mattie tell mattie! That gon be when de Mook go in front de judge in New York next year. So de Mook gettin excited bout Christmas, but he don’t want New Year to come!