No matter how much people tell de mayor-fuh-life Green Ham that he is de cause of de problems in GT de garbage town, he ain’t tekkin that. No matter how much advice he get from people, he ain’t tekkin that either. De only ting Green Ham tekkin these days is whah dem boys who seh dem is boys does give he. And de chief of dem is Mook Lall. That is who givin de mayor-fuh-life advice and a lotta other tings whah dem boys know bout.
When a Mook could be de boss or de chief fuh any body, yuh know that is blind leadin de blind, aka dotish leadin de paglee. De Mook got two of dem under tight control. Well, may not be tight any more, but control fuh sure. Dem is de mayor-fuh-life and de headitor.
People know a long time that Green Ham ain’t got plenty brains and that he head hard since de PEE-N-SEE days when he was a big one. De whole Guyana know he was and still is a fool, but he was still a big one. But is now people findin out that is not only de mayor-fuh-life head hard. He ears also hard. Old people does call it hard of hearin.
De whole GT flood out and de mayor-fuh-life in front of a mic blamin guvament and blamin people fuh de garbage instead of comin out to clean up some kokers and drains.
So when every body got on long boots, de mayor deh in he green shirt and kickers.
Now de Met Office gettin dotish like de mayor-fuh-life.
When dem tell people rain gon fall, is no rain. When dem don’t tell people rain gon fall, then is plenty rain.
Christmas comin up and Link Show does be till in the New Year. But people want to know if Robbin Robinson bring forward Link Show to Christmas because de Met Office already performin.
Ting-a-ling-a-ling… friend tell friend… mattie tell mattie! It musbe that de mayor-fuh-life and de Met Office tekkin advice from de Mook! Just when people used to tink was GT alone in trouble, now is de whole country!