De daily Link Show

TIMES INT'L

De Link Show entertain people with rough jokes and fuh de most part the show was good. But another link show tekkin place every day in Guyana. This is a link show that de people not actin, but dem writin.
In fact, dem actin like dem not actin, which is de true definition of actin. People pun de street callin it another link show, because everybody laughin when dem readin de lies what dem writin.
Some people call it Baddamn paper, because he is de liar-in-chief. Some call it Mook Lall paper because he is de chief lyin officer who does tell de liar-in-chief what fuh write. And Baddamn and de Mook does call it Kocheur News, because lie is de same as kocheur anyway.
So Run Robbin Sun got two big time actors already. De first one is Baddamn, who seh that de 50 (+10) birthday party had plenty people. Since he was countin people at de party like how de PEE NC used to count votes before 1992, he gon play de part of a vote counter and mek lil bit look like plenty, fuh de PEE NC. The next actor is Sus Penders Rum, who seh de Marriott gon have to sell fuh more than de US$ 51 million that it cost to build. Well, ah wonder who does build a house and sell it fuh de same price? And everybody thought Sus Penders Rum was an accountant.
So Sus Penders Rum gon play a comedian who mekkin people laugh even when he serious. Just that dem laughin at he and not wid he, like when people laugh at de joker and not de joke. And a joker like he want run de country. All he gon do is run it broke!
Ting-a-ling-a-ling… friend tell friend… mattie tell mattie! And look out in de Kocheur News fuh see who is de next actor in de daily link show. Ah bet de name gon rhyme with de word “look”.

Related posts