Barefacedness run out fuh de cash man

TIMES INT'L

It got some people around who just can’t tell a lie.
As soon as yuh look at dem yuh would know dem lie. But it got some other people who could really tell a lie. Old people seh dem bareface bad so yuh can’t know when dem tellin a lie.
In fact, dem could lie and lie and get rich. So rich dat dem could buy plenty ting wid cash money. If dem want house in Miami, dem pay cash. If dem want printin press in New York, dem pay cash. If dem want bring in container wid shoes and other tings in de shoes, dem pay cash.
Is not a easy life, but some people does mek it look easy. Guyana only got one ah dem and he does mek it look easy. Plenty people does wuk fuh he and help he fetch de cash, because he does gotta buy a lotta tings and go a lotta places.
A security guard see when he buy de mall pun Regent Street wid cash. Ah old man see when he buy de big store pun Main Street wid a whole suitcase of cash. One of he friend see when he buy de place in Eccles wid another suitcase of cash. Another friend see when he sell it out and collect couple well suitcases of cash too.
But he try to buy a pill de other day and he couldn’t find any in time, even wid all de cash he got. He tink about callin de pharma boss fuh mek one, but he was too shame to ask fuh de number. Dat was de first time he barefacedness ever run out.
Ting- a-ling-a ling… friend tell friend… mattie tell mattie! And watch out fuh see how de Mook gon spend more cash.

Related posts