Baddam and Mook Lall Get Friken

TIMES INT'L

It look like Baddam and Mook Lall at de Waterfalls paper get friken again like cat. Dem a walk about wid dem tail well between dem legs.
Just dat de Mook so short yuh still seein he tail at he side. De other one so bad looking yuh don’t even want fuh see he face, much less he tail.
Anyway, everybody sehing how dem run outta lies to write bout de pharma company, so dem decide fuh seh how de Beacon paper writing old news. But if yuh look back at all de pharma articles over de past few weeks in de Waterfalls paper, dem all seh de same ting.
When dem quote whah Jhaat Tan and Naggaman seh, dem both sehing de same ting…ova and ova. De Nagaman talk so much dat he even try fuh lie in Parliament until de AG ketch he red mouthed. And he used to call de AG a lil boy.
Even when dem quote from de Auditor General Report, dem still seh de same thing. Den dem find some nobody dem call Slypaul Sharma, and he end up seh de same ting too. If is one ting yuh could seh is dat at least dem all could lie real good.
Dem go get moh friken because de Bell Crier come back. Is all a dem go end up wid dem tail between dem legs now.
Ting-a-ling-a-ling…friend tell friend…mattie tell mattie!

Related posts